Trusselvurdering 2025: Det digitale trusselbildet mot spesialisthelsetenesta

I dag blir trusselvurderinga for spesialisthelsetenesta publisert. Trusselvurderinga belyser truslar knytt til utpressing, løysepengevirus, cyberspionasje, destruktive cyberangrep og sabotasje som kan ramme sjukehusa.

– Trusselvurderinga er viktig for å forstå det digitale trusselbildet spesialisthelsetenesta står overfor. Den gir oss innsikt i kven som ønsker å ramme våre IKT-system og digitale løysingar, og korleis dei kan gjere det. Denne kunnskapen er avgjerande for at vi skal vere godt førebudd, seier Inger Cathrine Bryne, administrerande direktør i Helse Vest RHF.  

Det er dei fire IKT-leverandørane i helseregionane og Norsk Helsenett som har utarbeidd trusselvurderinga. Vurderinga skal gi ei skildring av det digitale trusselbildet mot spesialisthelsetenesta, og vil gjelde for eitt år fram i tid.   

– Trusselvurderinga for 2025 er resultatet av eit grundig arbeid og eit godt samarbeid. Vurderinga er eit viktig verktøy i IKT-sikkerheitsarbeidet til alle dei fire regionane, seier Bryne.   

Krevjande sikkerheitspolitisk situasjon

Helse Vest IKT har leia arbeidet med årets trusselvurdering. Aksel Bruun, informasjonssikkerheitsleiar i Helse Vest IKT, fortel korleis dei har arbeidd for å møte dei nye utfordringane.  

– Det er krig i Europa, og dette set Noreg i ein krevjande sikkerheitspolitisk situasjon. Det transatlantiske samarbeidet har endra seg i år, noko som òg har ein innverknad, seier han.  

Spesialisthelsetenesta spelar ei viktig rolle i totalforsvaret, og dei regionale IKT-leverandørane har ansvar for kritisk infrastruktur i sjukehusa.  

– Med kritisk infrastruktur meiner vi all teknologisk støtte sjukehusa treng i pasientbehandlinga. Det er dei fire regionale IKT-leverandørane som forvaltar og har ansvar for helseopplysningane til innbyggarane i landet vårt. Difor er det heilt avgjerande at vi har god kontroll på denne infrastrukturen, og sørger for god beskyttelse og motstandsdyktigheit mot avanserte digitale truslar, seier Bruun.  

Les heile trusselvurderinga.